Vakansietyd is kuiertyd!

Dit is deel van ons kultuur om herinneringe rondom kostafels te bou.

2023 se skooljaar nader sy einde. Binnekort is dit hopelik rustiger en dan kan ons kuier. Informele, onbeplande kuiers is dikwels die lekkerste. Sonder moeite en stres!

Ten spyte van ekonomiese druk wil ons steeds stylvol kan onthaal. Die laventelbroodjie is 'n staatmaker! Dollie dit op saam met 'n kaasbord, seisoenale vrugte, regte botter en lekker konfyt en jy het 'n feesmaal. Dit vries goed en jy kan dit uithaal wanneer jy weet daar gaan gekuier word.

Dek jou tafel, skink 'n glas wyn of maak 'n koppie tee. Vergeet jou sorge en koester jou geliefdes. Natuurlik met min moeite, maar baie styl!

Die basis van die laventelbroodjie is:

500 ml karringmelk

500 g bruismeel

5 ml sout

5 ml Margaret Robberts laventel

Meng alles en bak vir ongeveer 'n uur by 180 grade Celcius. Pas die basisresep aan met dit waarvan jy hou. Ek voeg graag knoffelvlokkies, kaas en kruie by. Jy kan ook 'n pakkie bruinuiesoppoeier byvoeg ( al is dit nou erg uit die mode!)

Om 'n mieliebroodjie te maak, gebruik jy net 250 ml karringmelk, 'n blikkie geroomde suikermielies en 2 geklitste eiers.

Bederf jou mense daarmee in die feesseisoen. Dit is ook 'n lekker geskenk om saam te neem vir 'n gasvrou. Lekker bak!